Dors mon pti quinquin (berceuse ch'tis)

Refrain :
Dors min, min ptit kinkin,
Min ptit pouchin,
Min gros rogin !
Te m’fras du chagrin
Si te n’dors poin chqu’à dmain.

Ainsi l’aute jour unne pauve dintelière,
In amiclotant sin ptit garchon
Qu’i, dpui tros carts d’eure, ene faijot qu’brère,
Tachot d’l’indormir par unne canchon.
Èle li dijot : Min Narcisse,
Dmain t’aras du pain d’épice,
Du chuke à gogo
Si t’es sache et qu’te fais dodo…</strong>

Refrain

Et si te m’laiches faire unne bonne semainne,
J’irai dégager tin biau sarau,
Tin pantalon d’drap, tin gilliet d’lainne,
Comme un ptit milord te sras faraud !
J’tacatrai, l’jour del ducasse,
Un polichinel cocasse,
Un turlututu
Pour juer l’air du Capiau-pointu.</strong>

Refrain

Nous irons din l’cour Jannète-as-Vakes
Vir les marionnètes. Conme te riras,
Quant t’intindras dire : “Une doupe pou Jake !”
Pa l’polichinel qu’i parle maga.
Te li metras din s’menote,
Au lieu d’doupe, un rond d’carote !
I t’dira merci,
Pinse conme nous arons du plaisi ! </strong>

Refrain

Et si par asard sin maite I s’fache,
Ch’est alor, Narcisse, que nous rirons.
San nn’avoir invie, j’prindrai mn’air mache,
J’li dirai sin nom et ses sournoms !
J’li dirai des fariboles,
I m’in répondra des droles,
Infin, un chacun
Vera deus pestakes au lieu d’un …

Refrain

Alor, sère tes ieus, dors min bononme,
J’va dire une prière à Ptit-Jésus
Pour qu’i vyinne ichi, pindan tin sonme,
T’faire réver qu’jai les mains plainnes d’écus !
Pour qu’i t’aporte une cokile
Avec du chiro qu’i guile
Tout l’long d’tin minton,
Te t’poulèkras tros eures de long !

Refrain

L’mos qu’i vyint, d’Saint-Nicola ch’est l’fiète,
Pour sûr, au soir, i vyindra t’trouver.
I t’fra un sermon et t’laichra mète
In-dzou du balo un grand painnié …
I l’rimplira, si t’es sache,
D’séquois qu’is t’rindront bénache,
San cha, sin baudet
T’invoira un grand martinet.

Refrain

Ni les marionnètes, ni l’pain d’épice,
N’ont produit d’éfet, mais l’martinet
A vite rapagé l’petit Narcisse
Qu’i crainiot d’vir ariver l’baudet.
Il a dit s’canchon dormoire,
S’mère l’a mis din sn’ochinnoire,
A rpis sin coussin
Et répété vint fos che rfrain :

Refrain